奶媽生涯近7個月，有感而發

奶媽生涯近7個月，有感而發：

BB出世前，心知人奶最適合BB，但又怕俾太大壓力自己，一心諗住餵得幾多得幾多，儘力喇。

BB出左世，嘩，真係好攰好辛苦呀！一次過有無數事項要去適應，仲有個一日十幾次喊餓嘅人仔100%依靠你，你係佢健康同生存嘅關鍵，真係責任重大！每日唔夠休息，好想放棄，本著「同你死埋今日！」嘅想法，日日嘅短期目標都係最少餵埋當日啦。而為左爭取休息亦有補粉。

改名時，家人本著好奇嘅心問下師父BB意見。師父話BB大D皮膚唔好，好可能會有濕疹。雖然唔知可唔可信，但由於我都有，我深知濕疹嘅痛苦，亦知道餵人奶可減低BB有濕疹嘅機會，令我嘅更大壓力下，叫自己唔可以放棄，BB靠我㗎！短期目標由1日延長到1星期，而且多左個長期目標為3個月！

頭2個月真係最辛苦，捱到3個月，BB終於3個鐘先食一次，仲開始戒夜奶！舒服得多！長期目標順利完成，而且已經餵得好順，就無特別set 目標，總之繼續餵啦。

到4個月，唉！第一次塞！好驚發炎！原來BB厭奶，食少左（仲要由中碼變細碼），所以塞。BB又食翻夜奶，到而家仲係！加上後來開始食固體，塞嘅次數越來越多。

7個月嚟，餵得最舒服只有1個月。不過到左而家真係欲罷不能，點解？除左BB健康外，其中一個好關鍵嘅原因係 --- 唔洗開奶洗樽，真係超方便！又唔係無奶，無理由而家先翻轉頭^^

所以，各位奶媽及準媽媽，加油呀！係好辛苦，不過係值得㗎！